ஜெபத்தை ஏற்றுக்கொண்டருளும்
பல்லவி
ஏற்றுக்கொண்டருளுமே, தேவா!-இப்போ
தேழையேன் ஜெபத்தை இயேசுவின் மூலம்.
சரணங்கள்
1. சாற்றின ஆதி ஆயத்த ஜெபமும்,
சாந்தமாய் ஜெபித்த பாவ அறிக்கையும்,
தேற்றிக்கொண்டருளும் மன்னிப்பின் மருவும்[1]
திவ்விய பாதத்தில் வைக்கிறேன், ஸ்வாமி - ஏற்று
2. குறைவுண்டு இதிலே, அருமைப் பிதாவே,
குற்றம் மன்னித்திடும் யேசுவின் மூலம்;
முறைப்படி கேட்க நான் தெரியாத பாவி;
முழுதும் மேசையாமேல் வைக்கிறேன், ஸ்வாமி. - ஏற்று
3. மறுரூப ஆவி வேண்டுமென் ஸ்வாமி;
மனமெல்லாம் புதிதாக்கிடும் ஸ்வாமி,
சிறுமைப்பட் டடியேன், கேட்கிறேன் ஸ்வாமி;
தேற்றிடும், புது பெலன் ஊற்றிடும், ஸ்வாமி. - ஏற்று
4. விசுவாசம் பெருகி நிலைத்திடச் செய்யும்;
வெளிப்படும் மறைபொருள் பலப்படச் செய்யும்;
சிசுவைப்போல் மறுபடி பிறந்திடச் செய்யும்;
தேவாவி என்னுளந் தங்கிடச் செய்யும். - ஏற்று
[1] வாசனை
ராகம்: காபி
தாளம்: ஆதி தாளம்
ஆசிரியர்: அருளானந்தம்