பல்லவி
யேசு நாமம் ஒன்றை நம்புவீர்,
பூலோகத்தாரே.
சரணங்கள்
1. யேசு நாமம் ஒன்றை நம்பும்;
ரட்சண்யத்துக் கிதுவே ஸ்தம்பம்;
பேசும் வேறே நாமமெல்லாம்
பேருலகை ரட்சிக்காதே, - யேசு
2. பார்த்திபன் தவீது குல
கோத்திரக் கன்னிமரிபால்,
நேத்திரம் போலே உதித்து
நேமியின் ரட்சகனான, - யேசு
3. பூதலத் தஞ்ஞான இருள்
போக்கவே மெஞ்ஞான பெருஞ்
ஜோதியாய் விளங்கும் நீதிச்
சூரிய னான மகத்வ - யேசு
4. பாவிகளீடேற மோட்ச
பாக்கியம் பெறுவதற்காய்
ஜீவன் விட்டுயிர்த்தெழுந்து
சேணுலகுக் கேறிச் சென்ற, - யேசு
5. விண்டலத்தவர்கள் சூழ,
வெருண்டலகை பதறி வீழ;
மண்டலத்தைத் தீர்வை செய்ய
மாமுகில் மீதேறி வரும், - யேசு
ராகம்: கமாஸ்
தாளம்: ஆதி தாளம்
ஆசிரியர்: ஈ. பாக்கியநாதன்