யேசையாவே
கண்ணிகள்
1. ஐயா, நீரன்று அன்னா காய்பாவின் வீட்டில்
நையவே பட்ட பாடு, ஏசையாவே!
கைகள் கட்டப்பட்டதோ? கால்கள் தள்ளாடினவோ?
கயவர்கள் தூஷித்தாரோ, ஏசையாவே!
2. திரு முகம் அருள் மங்க, செங்குருதிகள் பொங்க,
இருளர்[1] கஸ்திகொடுக்க, ஏசையாவே!
பொறுமை, அன்பு, தயாளம் புனிதமாக விளங்க
அருமைப் பொருளதான ஏசையாவே!
3. முள்ளின் முடியணிந்து, வள்ளலே, என் றிகழ
எள்ளளவும் பேசாத ஏசையாவே!
கள்ளன் போலே பிடித்துக் கசையால்[2] அடித்து மிகக்
கன்மிகள் செய்த பாவம், ஏசையாவே!
4. கற்றூணில் சேர்த்திறுக்கிச் செற்றலர்தாம்[3] முறுக்கிக்[4]
கர்வங்கொண்டே தூஷிக்க, ஏசையாவே!
சற்றுமிரக்கமில்லாச் சண்டாளன் ஓடி வந்து
சாடிக் கன்னத்தறைய ஏசையாவே!
5. பொன்னான மேனியதில் புழுதி மிகப் படிய
புண்ணியன் நீர் கலங்க, ஏசையாவே!
அண்ணலே, அன்பருய்ய அவஸ்தைகளைச் சகித்தீர்!
அடியேனைக் காத்தருளும், ஏசையாவே!
[1] கொடியவர்
[2] சவுக்கால்
[3] பகைவர்கள்
[4] சினந்து
ராகம்: நீலாம்புரி
தாளம்: ஆதிதாளம்
ஆசிரியர்: சவரிமுத்துப் போதகர்