சீர் ஏசுநாதனுக்கு ஜெயமங்களம்
பல்லவி
சீர் ஏசு நாதனுக்கு ஜெயமங்களம்; ஆதி
திரி யேக நாதனுக்குச் சுபமங்களம்.
அனுபல்லவி
பாரேறு நீதனுக்கு, பரம பொற் பாதனுக்கு,
நேரேறு[1] போதனுக்கு நித்திய சங்கீதனுக்கு. - சீர்
சரணங்கள்
1. ஆதி சரு வேசனுக்கு, ஈசனுக்கு மங்களம்;
அகிலப்[2] பிர காசனுக்கு, நேசனுக்கு மங்களம்
நீதி பரன் பாலனுக்கு, நித்திய குணாலனுக்கு,[3]
ஓதும் அனு கூலனுக்கு, உயர் மனுவேலனுக்கு. - சீர்
2. மானாபி மானனுக்கு, வானனுக்கு மங்களம்;
வளர் கலைக் கியானனுக்கு, ஞானனுக்கு மங்களம்
கானான் நல் தேயனுக்குக், கன்னிமரிசேயனுக்கு
கோனார் சகாயனுக்குக், கூறு பெத்த லேயனுக்கு. - சீர்
3. பத்து லட்ச ணத்தனுக்குச், சுத்தனுக்கு மங்களம்;
பரம பதத்தனுக்கு நித்தனுக்கு மங்களம்;
சத்திய விஸ்தாரனுக்குச், சருவாதி காரனுக்கு,
பத்தர் உப காரனுக்குப், பரம குமாரனுக்கு. - சீர்
ராகம்: சுருட்டி
தாளம்: ஆதிதாளம்
ஆசிரியர்: வே. சாஸ்திரியார்
[1] நன்னெறி
[2] பூமி
[3] குணாலயனாகிய கடவுளுக்கு